التسميــــــــــــــــــــد العضوى

التسميــــــــــــــــــــد العضوى 

Organic fertilization

خلق الله -تعالي- الانسان والحيوان والنبات كل منهم يحتاج الي الغذاء ليتمكن من المقدرة علي مواجهة الحياة فكل منهم له مصادرة الخاصة التي يحصل بها علي غذاءه فالنبات محور المقال يحصل علي الغذاء من التربة وعشان النبات يكون سليم لازم التربه بتاعته تكون سليمه وصحيه ، وصحة التربه مش بتقتصر على العناصر الغذائيه بس لكن على تحسين قوام التربه والمحافظه على التوازن الحيوى فيها لان ما بنى على باطل فهو باطل .

لو انا مهتم قوى اضيف كل حاجه بس الارض عامله زى الغربال هتبقى عامله زى ما كان دكتور بيقولى كانك بتشرب شوربه فى مصفايه يادوب تلحق منها معلقه وبالباقى يروح على الفاضى .

....................

طب ايه العناصر اللى بيحتاجها النبات الاول قبل ما نشوف موضوع قوام التربه ده .

النبات بيحتاج عناصر كتير ممكن نقسمها 3 حاجات .

1 عناصر اساسيه  :.

ودى الحمد لله بفضل الله ربنا ميسرها جدا جدا جدا لانها صعب اننا نجيبها فهى جايه كده من عند ربنا ببلاش اللى هما ( الكربون _ الهيدروجين _ الاكسجين )

ودول بياخدهم النبات من الميه والهوا .

 عناصر كبرى 2

ودول التلاته الاكتر تداولا واكتر حاجه بيحتاجها النبات بعد الاساسيه واكتر حاجه بنضيفها احنا للتربه اللى هما ( النيتروجين او الازوت - الفسفور - البوتاسيوم ) ( N.P.K ) .

 عناصر صغرى 3

ودول مش معنى كده ان ملهمش لازمه بالعكس انما صغرى لان الاحتياج ليهم قليل قوى بالنسبه للى قبلهم لكن من غيرهم ممكن الدنيا تقف زى مثلا الماغنسيوم المكون الرئيسى للكلورفيل والكلورفيل ده اللى موجوده جوه الورق اللى بيعمل عمليه البناء الضوئى يعنى مصنع الاكل بتاع النبات من غيره الدنيا كلها تبوظ بس .

العناصر دى كتيره قوى هنقول منها ان فى تلاته مهمين قوى ( كالسيوم - كبريت - ماغنسيوم )

والباقى بقى مهمين برضو واللى منهم ( حديد - زنك - نحاس - منجنيز - بورون - كلور - مولبديوم كوبلت )

حاجه صغيره قبل ما نخشفى الموضوع ،تخيلوا مثلا عنصر زى البوررن اللى بنقول عليه من العناصر الصغرى مهمته ايه فى النبات او مهمه من مهماته ( مسؤل عن اطاله الانبوبه اللقاحيه عشان تلقح الزهره المؤنثه وتكتمل عمليه التلقيح عشان تحصل على الثمار ) 

مهمه رهيبه ، زيادته فى النبات بحاجه لا تذكر يعمل سميه للنبات ويموت وقلته متخليش فى محصول .

العمليه تاهت منكوا ؟

متقلقوش دى مقدمه لابد منها بس هقولكوا على المفيد لحياه طبيعيه وصحيه ان شاء الله

طب عرفنا ايه اللى بيحتاجه النبات للنمو السليم ، العناصر بكل اشكالها و اهميتها للنبات ، طب احنا كنا قولنا ان مهما حطيت من مواد غذائيه للنبات عمره ما هيستفاد طول ما التربه بتاعتى مش سليمه زى ما قولنا ان ما بنى على باطل فهو باطل .

طب برضو قبل كل ده فى خلاف وجدال بالنسبه للناس اللى مش متخصصه فى الزراعه ومتعرفش الفرق بين انواع التسيمد او حتى ايه التسميد نفسه والناس اللى بتقلق من السماد الكيماوى والاسماء الكتيره اللى بتتقال NPK ونيتروجين ومش عارف ايه ، هو فى فرق ؟

طبعا فى فرق .

فى فرق بين طبيعه ربنا خلقها لينا وبين محاوله تصنيع الطبيعه دى فى المعامل عشان تخرجلنا مواد اه بتدى النبات احتياجاته لكن بتضر البيئه لانها مش طبيعيه .

كل ما هو سماد كيماوى ضار سواء للانسان او الحيوان لان اللى هياكل النبات ده يا ثمره احنا بناكلها يا حيوان بياكل النبات وفى الاخر برضو احنا بناكل من الحيوان ده ، يعنى فى الاخر احنا اللى هننضر ، بخلاف الاضرار الكتيره اللى موجوده فى الاسمده الكيماويه اللى كلكوا او معظمكوا عارفها .

عشان كده انا هنا هنتكلم عن الطبيعه والصحه عن التسميد العضوى والحيوى .

طب نرجع تانى للاساس اللى كنا بنقول عليه قوام التربه اللى عايزه يبقى صحى وسليم .

عشان احافظ على تربه سليمه او من الاساس اعمل تربه سليمه يبقى لازم يكون عندى ماده عضويه يعنى اسمد باسمده عضويه .

ليه ؟

اولا انا مثلا لو بزرع فى ارض رمليه ، وحطيت كل حاجه مفيده فى الارض دى وحطيت كل الاسمده اللى فى الدنيا من غير مواد عضويه عمر النبات ما هيستفاد حاجه ، ليه لان الارض الرمليه عامله زى المصفى او الغربال تحط السماد وتسقى تروح الميه نازله وواخده كل حاجه معاها لتحت والنبات ميعرفش يمسك منها حاجه وبالتالى بقى عندى فقد كبير سواء فى العناصر الغذائيه او فى الميه نفسها ، وبالتالى تلاقى الناس تقولك والله بضيف وبعمل وكل حاجه والنبات زى ما هو .

مهو للاسف زى ما قولت قبل كده بتشرب شربه فى مصفايه .

طب ايه دور الماده العضويه او السماد العضوى هنا ، دوره انه بيمسك العناصر الغذائيه الموجوده فى التربه الرمليه .

طب لو الارض طينه اللى بتمسك الميه زياده عن اللزوم وتعملى مشاكل فى الصرف وتسبب اعفان ولو الارض نشفت تعمل تشقق ممكن يقطع الجزور .

الماده العضويه تقوم عامله توسعه للمسافات البينيه بين حبيبات الطين وبالتالى تعمل تهويه وتصرف الميه بشكل سليم فى التربه الطينيه .

بالتالى لما الاقى ان مواصفات التربه اللى انا زراع فيها اتحسنت هينعكس بشكل ايجابى على النبات نفسه ونكون عملنا ليه اساس سليم يتبنى عليه نبات قوى جدا .

وهيمتص كل العناصر اللى فى التربه ويديها للنبات وغير ده كله هيذود فى الكائنات الحيه الدقيقه اللى فى التربه اللى ليها دور كبير قوى فىتوفير العناصر الغذائيه للنبات .

التسميد العضوى :

ــــــــــــــــــــــــــــ

ايه هو التسميد العضوى ، هو انى بقوم بعمليه استرجاع للعناصر الغذائيه والمواد اللى النباتات استهلكتها زمان من التربه ، برجع الحاجات الطبيعيه لمكانها تانى عشان نبات جديد يستهلكها وهكذا

بسم الله الرحمن الرحيم  مِنْهَا خَلَقْنَاكُمْ وَفِيهَا نُعِيدُكُمْ وَمِنْهَا نُخْرِجُكُمْ تَارَةً أُخْرَىٰ (55)

صدق الله العظيم

الطبيعه مداينه كل حاجه على الفطره زمان قوى مكنش فيه كيماويات ولا كلام فاضى من اللى موجود دلوقتى وكانت الدنيا زى الفل والناس بتاكل احسن خضار واحسن فاكهة ، بس طمع الانسان هو اللى وصلنا للى احنا فيه دلوقتى .

ما علينا .

زى ما قولنا من شويه عن اهميه المواد العضويه فى تحسين قوام التربه وهى الاساس اللى هينمو فيه النبات بشكل سليم بعد لما خلينا الاساس سليم ، برضو المواد العضويه ليها ادوار تانيه مهمه بتقوم بيها بخلاف انها بتوفر الغذاء السليم للنبات وتحسن قوام التربه اللى تعتبر كمان احسن من المواد الكيماويه اللى ملهاش دعوه بالتربه وممكن تفسد التربه وتفسد الميه كمان ، اننا ممكن كمان نستفيد من المواد العضويه بحاجه اسمها غطاء التربه اللى ليه دور كبير جدا انه يوقف نمو الاعشاب الضاره او يقضى عليها كمان .

طب ايه المواد العضويه المتاحه لينا وادوارها ؟

هنقسمها لكذا حاجه 

ــــــــــــــــــــــــــــ

 مواد عضويه بيتقال عليها ضخمه :. اللى بتقوم بتحسين التربه وامداها بالعناصر 

زى ايه :.

 قش الرز : هو قليل التخصيب لكن ممتاز جدا فى عمليه التغطيه .

 نشاره الخشب الخشنه : زى القش .

 نشاره الخشب الناعمه : زى القش برضو بس ممكن اخلطها بالتربه عشان التهيه .

 اوراق الاشجار : زى نشاره الخشب الناعمه .

 نواتج تقليم الورق الاخضر زى النجيل وورق الشجر الاخضر : متوسط الامداد فى العناصر الغذائيه .

 الكمبوست العادى : امداد النبات بالعناصر الغذائيه وتحسين خواص التربه .

 فضلات الحيوانات : سماد عالى القيمه الغذائيه ، بس لازم يتخمر الاول .

 كمبوست الدود : وهو اعلى مصدر للمواد والعناصر الغذائيه للتربه ,

طب ايه تانى مواد عضويه ممكن نستخدمها :.

عندى حاجه اسمها السماد الاخضر ( ودى للاراضى الكبيره شويه مش للبيوت بس تنفع لحديقه منزليه )

عباره عن نباتات بتتزرع عشان نحرتها فى الارض نفسها عشان تحسن من خواص التربه وتمدها بالعناصر الغذائيه خصوصا النيتروجين لانها بتثبت النيتروجين من الجو .

النباتات دى زى ايه ( الفول _ الترمس _ القمح _ الشعير _ البرسم _ اللوبيا والفاصوليا )

فى حاجات تانيه او مصادر تانيه للمواد العضويه او المخصبات العضويه بس ليها تخصصات معينه من حيث توفير عناصر بعينها زى :

مسحوق العظام 

دم مجفف

اعشاب البحر 

بدره البلاط 

والفوسفات الصخرى 

وكلها مواد طبيعيه مفيهاش اى مشاكل

الحاجه الاخيره برضو من الحاجات العضويه ( المخصبات الحيويه ) 

ودى بتعتمد على كائنات حيه دقيقه بيتم اضافتها للتربه سواء بخلطها او بنقع البذور فيها قبل الزراعه ودى بتقوم بدور مهم جدا انها بتوفر العناصر الغذائيه بشكل كبير جدا للنبات .

بصوا يا حضرات اتفقنا على حاجتين مهمين جدا ، اولا ان عشان اغذى النبات بشكل سليم يبقى التربه لازم تكون مهيئه لانها تستقبل اللى هضيفه ، تتهيأ ازاى بانى لما اخلط التربه لازم يكون فى ماده عضويه تمسك المواد الغذايه فى التربه وتمسك الميه .

طب اجيب منين الماده العضويه .؟

قولنا عليهم .

بس انا هقولكوا على حاجه صغيره تختصر كل ده .

لو مثلا عندى كمبوست هيبقى هخلط الكمبوست عندى فى التربه بتاعتى وعلى فترات هعمل تسميد بمحلول مغذى .

طب لو معنديش كمبوست وعندى مثلا روث حيوانات .

يبقى زى ما قولنا قبل كده هنعمل الاتى .:.

هنجيب جردل ونحط تلته سماد بلدى ( روث حيوان ) والتلتين ميه .

نسيبهم لحوالى 7 ايام ، لحد ما الريحه الوحشه تروح ( معناه ان التخمر انتهى )

بصفى المحلول بتاعى .

طب الماده العضويه او روث الحيوان اللى فضل ارميه .؟

اوعى ترميه ده ممتاز لانه اصبح ماده تتخلط بالتربه بشكل رائع تحتفظ بالماء وتمسك العناصر الغذائيه بشكل ممتاز .

طب المحلول اللى عندى ارشه ازاى عشان اسمد .؟

بجيب 1 لتر من المحلول واخففه ب 10 لتر ميه وعليه معلقه زيت او معلقه صابون قلى عشان الرش يثبت على الورق ، وارش منه كل 3 اسابيع ده هيدى النبات احتياجاته من المواد الغذائيه بشكل ممتاز وطبيعى وعضوى ويحسن من نمو النبات وشكل الثمره وفى نفس الوقت هيخلى الورق مقاوم للامراض 

لو هروى السماد رى مش رش يبقى كل يومين بروى بيه ريه خفيفه .

........

طب الحمد لله كده عرفت ازاى اسمد سماد عضوى وايه هى الاسترتيجيه بتاعت التسميد ، اننا بنأسس للتسميد وبنسمد بعدها .

حاجه مهمه اننا لازم نعرف ان كل عنصر من العناصر ليه وظيفه محدده وبالتالى لو النبات مخدش كفايته من العنصر ده مش هيقدر يقوم بوظيفته .

طب فى حاجه مهمه جدا لازم نقول عليها ، مش شرط انى لما الاقى النبات ضعيف يبقى محتاج عناصر غذائيه او تسميد ، ممكن تكون الاسباب حاجه تانيه زى ايه ( نمو حشائش _ زياده كثافة النباتات فى ماكن واحد _ العطش _ الميه الذياده _ الامراض )

لازم برضو نبقى عارفين حاجه اعرف بيها النبات محتاج ايه من العناصر وده بيظهر على النبات فى شكل علامات بتدل على نقص العنصر ده ومكان العلامه بمعنى :.

التلات عناصر N.P.K من العناصر سهلة الحركه وتبدا ظهور اعراض النقص على النبات على الورق القديم يعنى النبات من تحت لفوق .

والعناصر زى الحديد والمغنسيوم والزنك حركتهم صعبه فى النبات فيبدأ ظهورهم على الورق الجديد يعنى من فوق لتحت .

من المهم جدا طبعا خصوصا للمزارع ان لما اى حد يكون هيبدا يزرع ارض يعمل تحليل للتربه عشان يعرف ايه العناصر الموجوده فى التربه عشان يكمل باقى العناصر اللى هيحتاجها النبات عشان يضيفها للتربه .

واخيرا يارب اكون قدرت افيدكوا ولو بمعلومه واحده ، ويارب كل الناس تتجه للتسميد العضوى ، سهل جدا اشترى علبه سماد كيماوى واسمد بيها وافرح بالشجر بتاعى ، بس مش هفرح على صحتى وصحة اولادى .

المصدر

تابعنا علي صفحة facebook هنا

تابعنا علي utube هنا